ന്യൂഡൽഹി: നിയമസഭ തെരഞ്ഞെടുപ്പ് അടുത്തിരിക്കെ ആസാമിൽ കോൺഗ്രസിന് കനത്ത പ്രഹരം. മുതിർന്ന നേതാവും എംപിയുമായ പ്രദ്യുത് ബോർദോലോയ് കോൺഗ്രസ് വിട്ട് ബിജെപിയിൽ ചേർന്നു. ബുധനാഴ്ചയാണ് പ്രദ്യുത് ബോർദോലോയ് ബിജെപി അംഗത്വം സ്വീകരിച്ചത്.
ശശി തരൂർ എംപിയെ പിന്തുണച്ചതിന്റെ പേരിൽ തനിക്ക് കോൺഗ്രസിനുള്ളിൽ കടുത്ത അപമാനം നേരിട്ടതായും പ്രദ്യുത് ബോർദോലോയ് ആരോപിക്കുന്നു. കോൺഗ്രസിൽനിന്നും രാജിവെച്ച് ഡൽഹിയിലെത്തിയ പ്രദ്യുത് മുഖ്യമന്ത്രി ഹിമന്ത ബിശ്വ ശർമയുടെ സാന്നിധ്യത്തിലാണ് ബിജെപി അംഗത്വമെടുത്തത്.
പ്രദ്യുതിന്റെ മകൻ പ്രതീക് ബോർദലോയ് ഈ തെരഞ്ഞെടുപ്പിൽ മാർഗരിറ്റ സീറ്റിൽ കോൺഗ്രസ് സ്ഥാനാർഥിയായി മത്സരിക്കുന്നുണ്ട്. നാഗോൺ മണ്ഡലത്തിൽനിന്ന് രണ്ടുതവണ എംപിയായ കോൺഗ്രസ് നേതാവാണ് പ്രദ്യുത്.